Главная » 2011 » Հունվար » 29 » ՈՒՍԱՆՈՂԱԿԱՆ ԻՆՔՆԱԿԱՌԱՎԱՐՈՒՄԸ ԵՊՀ-ՈՒՄ ԲԱՐՁՐ ՄԱԿԱՐԴԱԿԻ Է
12:20
ՈՒՍԱՆՈՂԱԿԱՆ ԻՆՔՆԱԿԱՌԱՎԱՐՈՒՄԸ ԵՊՀ-ՈՒՄ ԲԱՐՁՐ ՄԱԿԱՐԴԱԿԻ Է
Հունվարի 24-ից 26-ը Մոսկվայի Մ. Վ. Լոմոնոսովի անվան պետական
համալսարանում տեղի է ունեցել ԱՊՀ երկրների ուսանողական եւ երիտասարդական
կազմակերպությունների 6-րդ ֆորումը, որին մասնակցում էին երիտասարդներ ԱՊՀ
բոլոր ու Մերձբալթյան երկրներից:
Ֆորումին մասնակցում էր նաեւ Երեւանի պետական համալսարանի ուսանողական
խորհուրդը. այն ներկայացնում էր ՈՒԽ նախագահ Ցոլակ Ակոպյանը: Ի դեպ,
ֆորումի օրերը համընկել են նաեւ մի քանի տոների հետ: 2011 թվականի հունվարի
25-ին Մոսկվայի պետական համալսարանը (ՄՊՀ) նշում էր հիմնադրման
256-ամյակը: Ֆորումի անդամները մասնակցել են նաեւ համառուսաստանյան
ուսանողության օրվան նվիրված «Տատյանայի օր» կոչվող միջոցառմանը:
2011 թ-ը հոբելյանական է ԵՊՀ գործընկերոջ` Մոսկվայի պետական համալսարանի
համար: Այս տարի նշվում է ռուս մեծ գիտնական Մ. Վ. Լոմոնոսովի 300-ամյակը:
Վերջինիս անունով էլ կոչվում է Ռուսաստանի ամենամեծ բուհը: Ցոլակ Ակոպյանի
փոխանցմամբ` ֆորումի ընթացքում ձեռք է բերվել պայմանավորվածություն, ըստ
որի` հոբելյանին նվիրված միջոցառումներ տեղի կունենան ԱՊՀ երկրների բոլոր
բուհերում:
Ֆորումի ընթացքում ԵՊՀ ՈՒԽ նախագահ Ցոլակ Ակոպյանը Մոսկվայի պետական
համալսարանի ՈՒԽ-ի հետ կնքել է համագործակցության հուշագիր, որով
պարտավորվել են սերտացնել երկու բուհերի ուսանողական կառույցների միջեւ
արդեն իսկ ձեւավորված հարաբերությունները: Մասնավորապես այս տարվա
ընթացքում ԵՊՀ-ում տեղի կունենան ՄՊՀ-ի ՈՒԽ օրեր, եւ հակառակը: Ցոլակ
Ակոպյանը վստահեցրեց, որ մեր բուհի եւ ԱՊՀ երկրների բուհերի ուսանողների
միջեւ համագործակցությունը տարիների ավանդույթ ունի. հիմա ժամանակն է կապեր
հաստատել եվրոպական ուսանողական կազմակերպությունների հետ եւ փորձել
յուրացնել նրանց փորձը:
ԵՊՀ ՈՒԽ նախագահը ֆորումի ընթացքում հանդես է եկել նաեւ զեկույցով, որի
ընթացքում ներկայացրել է ԵՊՀ-ի փորձը ուսանողական ինքնակառավարման
ասպարեզում: «Այս առումով մեզ մոտ առաջընթացը բավականին մեծ է»,- համոզված է
Ցոլակը: Համեմատելով մեր բուհի ՈՒԽ-ի եւ Մոսկվայի պետական համալսարանի
ՈՒԽ-ի ակտիվությունը` Ցոլակ Ակոպյանը նկատեց, որ ՄՊՀ-ի ՈՒԽ ակտիվը կազմում է
100-200 ուսանող` 50.000-ից ավելի սովորողների պարագայում, իսկ ԵՊՀ ՈՒԽ
ակտիվը` 700 ուսանող, այն դեպքում, երբ մեր ուսանողների թիվը շուրջ 20.000
է: Բացի այդ` նրա դիտարկմամբ` ԱՊՀ երկրների բուհերի ՈՒԽ-ները զբաղվում են
հիմնականում ուսանողների սոցիալական խնդիրներով, իսկ ահա Մայր բուհը
ուսանողական ինքնակառավարման ցուցանիշով կարող է մրցել եվրոպական բուհերի
հետ: