Главная » 2011 » Մարտ » 2 » Կրթատոշակին արժանացան 94 առաջին կուրսեցիներ
16:58
Կրթատոշակին արժանացան 94 առաջին կուրսեցիներ
Գիտելիքահեն տնտեսություն եւ գիտելիքահեն հասարակություն. սրանք այն երկու համոզմունքներն են, որոնց համար ՀՀ վարչապետ Տիգրան Սարգսյանը թեեւ շատ է արժանացել քննադատության, բայց որոնց իրավացիության մեջ վարչապետը վստահ է: «Ժամանակակից աշխարհը ինտելեկտի մրցակցության աշխարհ է: Ես համոզված եմ, որ սրան այլըտրանք չկա»,- այսօր ԵՊՀ-ում կայացած հանդիպման ժամանակ հայտարարեց Տիգրան Սարգսյանը` խորհուրդ տալով, որ ուսանողների ձգտումը դեպի գիտելիքը երբեւէ չպակասի:
Հանրապետության վարչապետն ու Կրթության եւ գիտության նախարարն այսօր Մայր բուհ էին այցելել հաճելի արարողության համար: Նրանք 100-120 հազ. դրամի չափով միանվագ կրթաթոշակներ հանձնեցին ՀՀ պետական բուհերի 572 առաջին կուրսեցիների: Անվճար համակարգում չընդգրկված, բայց գերազանց առաջադիմություն ունեցող առաջին կուրսեցիների համար նախատեսված կրթաթոշակների մրցույթին մասնակցել է շուրջ 800 ուսանող: ԵՊՀ-ից կրթաթոշակներ ստացան 94 առաջին կուրսեցիներ, որոնցից 14-ը` 120.000, 80-ը` 100.000 դրամի չափով:
ԵՊՀ ռեկտոր Արամ Սիմոնյանը ներկաներին շնորհավորեց նախ գարնան գալու կապակցությամբ, այնուհետեւ վարչապետի այցելության եւ կրթաթոշակների տրամադրման համար: Ռեկտորը նաեւ հույս հայտնեց, որ վերջինը ձեռք կբերի ավանդույթի բնույթ:
«Մեր հույսը պետք է կապենք աղջիկների հետ»,- նկատելով կրթաթոշակ ստացողների մեջ արական սեռի ուսանողների սակավությունը` նշեց ՀՀ վարչապետը: Նա նաեւ իր մտահոգությունը հայտնեց տղաների առաջադիմության վերաբերյալ` վստահեցնելով, որ այս հարցն առաջիկայում կդառնա լուրջ քննարկումների առարկա:
Վարչապետը խոստացավ, որ առաջիկայում կհանդիպի ուսանողների հետ եւ նրանց հետ կքննարկի երիտասարդությանը հուզող խնդիրները: Իսկ այս հանդիպմանը նա հասցրեց պատասխանել միայն երկու ուսանողի կողմից բարձրացված հարցերին:
ԵՊՀ արեւելագիտության ֆակուլտետի ՈՒԽ նախագահ Գոռ Ավագյանին հուզում էր բուհերում կոռուպցիայի դեմ պայքարի խնդիրը: Տիգրան Սարգսյանը վստահեցրեց, որ կոռուպցիայի դեմ պայքարում ուսանողական կառույցների հետ համագործակցությունն իր համար աքսիոմա է: «Ցանկացած նախաձեռնություն, որ կլինի ուսանողների կողմից, ստանալու է մեր աջակցությունը»,- հայտարարեց ՀՀ վարչապետը:
Գիտելիքահեն տնտեսություն եւ գիտելիքահեն հասարակություն. սրանք այն երկու համոզմունքներն են, որոնց համար ՀՀ վարչապետ Տիգրան Սարգսյանը թեեւ շատ է արժանացել քննադատության, բայց որոնց իրավացիության մեջ վարչապետը վստահ է: «Ժամանակակից աշխարհը ինտելեկտի մրցակցության աշխարհ է: Ես համոզված եմ, որ սրան այլըտրանք չկա»,- այսօր ԵՊՀ-ում կայացած հանդիպման ժամանակ հայտարարեց Տիգրան Սարգսյանը` խորհուրդ տալով, որ ուսանողների ձգտումը դեպի գիտելիքը երբեւէ չպակասի:
