Հայագիտության թերությունների մասին խոսելիս ԵՊՀ ռեկտորը` իբրեւ գիտնական,
առանձնացրեց կովկասագիտության ինստիտուտի բացակայությունը: Այդ ուղղությամբ
համալսարանն արդեն քայլեր ձեռնարկել է: 2012 թ-ից ԵՊՀ պատմության
ֆակուլտետում պատրաստվելու են կովկասագետներ, ովքեր կտիրապետեն ոչ միայն
ժամանակակից վրացերենին եւ ադրբեջաներենին, այլեւ հին վրացերենին,
գրաբարին, թուրքերենին, պարսկերենին, հին եւ նոր հունարենին:
«Մեր թուրքագետների մակարդակը թեեւ բավականին բարձր է, բայց նրանց քանակը
չի կարող մեզ բավարարել: Մենք պատրաստում ենք նաեւ օսմանագետներ: 3 հոգի
այսօր Սանկտ Պետերբուրգի համալսարանում հատուկ ծրագրով մասնագիտանում են
օսմանագիտության գծով»,- տեղեկացրեց Արամ Սիմոնյանը:
Ռեկտորը օսմանագետների պատրաստումը կարեւորեց նրանով, որ թուրքական
արխիվներում եղած փաստաթղթերը հիմնականում օսմաներեն են:
Առաջնահերթությունների շարքում է նաեւ ղփչաղերենի մասնագետների
պատրաստումը: Ղազախները ղփչաղներին համարում են իրենց նախնիները, իսկ
հայ-ղազախական հարաբերությունները կրթական ոլորտում բավականին սերտ են:
Բացի այդ` կա հայատառ ղփչաղերեն գրականություն, որը թարգմանության կարիք է
զգում: Նախատեսվում է նաեւ քրդագետների պատրաստում: Հայագիտության
զարգացման այս ծրագրին դրական արձագանք է տվել ԿԳ նախարարը:
Պարոն Սիմոնյանը, հակիրճ անդրադառնալով վերջերս ՀՀ ԳԱԱ-ում կայացած
ընտրություններին, նշեց, որ իր չընտրվելու պատճառը չի կարող ասել, քանի որ
քվեարկությունը փակ է եղել, իսկ իրեն ընդամենը մեկ ձայն է պակասել: «Ինձ
թվում է, որ զուտ տարիքային խնդրից ելնելով` պետք է ակադեմիայում ավելի
երիտասարդ մարդիկ հայտնվեին, ովքեր այսօր գործող գիտնականներ են: Կարծում
եմ` ինչ-որ փոփոխություններ անհրաժեշտ են, նաեւ այս ընտրակարգն է
փոփոխության կարիք զգում»,- ավելացրեց նա:
Այս տարի ՀՀ Կառավարությունը հաստատել է ԿԳ նախարարության ներկայացրած
հակակոռուպցիոն ծրագիրը: ԵՊՀ ռեկտորը տեղեկացրեց, որ այդ ծրագրի որոշ
դրույթներ էլ մշակվել են համալսարանի ներկայացրած առաջարկությունների հիման
վրա: ԵՊՀ-ում ստեղծվել է հակակոռուպցիոն մշտական հանձնաժողով, որի
անդամները ոչ միայն ԵՊՀ աշխատակիցներ են, այլեւ ուսանողական կառույցների
ներկայացուցիչներ:
Կոռուպցիոն ռիսկերը կրճատելու համար էլ քննություններն են ավելի թափանցիկ
դարձել: Այսինքն` ցանկացած համալսարանական, այդ թվում եւ ուսանողները,
իրավունք ունեն հետեւելու քննությունների ընթացքին հենց քննասենյակում:
Լրագրողները հետաքրքրվեցին նաեւ կոռուպցիայի համար աշխատանքից ազատված
աշխատակիցների մասին: Պարոն Սիմոնյանը նշեց, որ այդպիսի դեպքեր եղել են,
սակայն քիչ: Բացի այդ` նրանց պետք է պատժեն իրավապահ մարմինները, իսկ ԵՊՀ
ղեկավարության խնդիրն է ստեղծել այնպիսի միջավայր, որ այդ ռիսկերը հասցվեն
նվազագույնի:
Իսկ համալսարանի առջեւ դրված խնդիրներից ռեկտորն առանձնացրեց
3-ը`աշխատակազմի` երիտասարդ կադրերով համալրումը, կրեդիտային համակարգի
կատարելագործումը եւ գիտահետազոտական աշխատանքները կիրառական ոլորտ
տեղափոխելը:
Արամ Սիմոնյանն անդրադարձավ նաեւ այս տարի կայանալիք ԵՊՀ ռեկտորի
ընտրություններին: Նա նշեց, որ թեկնածուների առաջադրումը տեղի կունենա
ավելի ուշ, իսկ ինքը դեռ չի որոշել` կառաջադրվի, թե ոչ: