Главная » 2011 » Մարտ » 11 » ՈՒՍԱՆՈՂՆԵՐԸ ՀԵՏԱՔՐՔՐՎԱԾ ԵՆ ԲԱՆԿԱՅԻՆ ՈԼՈՐՏՈՎ
20:50
ՈՒՍԱՆՈՂՆԵՐԸ ՀԵՏԱՔՐՔՐՎԱԾ ԵՆ ԲԱՆԿԱՅԻՆ ՈԼՈՐՏՈՎ
ԵՊՀ շրջանավարտների եւ կարիերիայի կենտրոնի նախաձեռնությամբ համալսարանի ակտիվ ուսանողները պարբերաբար այցելում են Հայաստանում գործող միջազգային կազմակերպությունների երեւանյան գրասենյակներ:
Շրջանավարտների եւ կարերիայի կենտրոնի տնօրեն Լիլիթ Հակոբյանը կարեւորում է ուսանողների ու գործատուների անմիջական հանդիպումները, իսկ Համաշխարհային բանկի նման մեծածավալ գործունեություն իրականացնող կառույցի ծրագրերին ուսանողների տեղեկացված լինելը կենտրոնի տնօրենն անհրաժեշտ նախապայման է համարում:
Բանկի մասին ամբողջական պատկերացում կազմելու համար հայաստանյան գրասենյակում ուսանողներին նախ ցուցադրեցին Համաշխարհային բանկի միջոցներով իրականացված առողջապահական ոլորտին վերաբերող ֆիլմ, ապա մանրամասն պատմեցին բանկի ընդհանուր կառուցվածքի ու գործունեության մասին:
Բանկի հանրային իրազեկման պատասխանատու Արմինե Գրիգորյանը տեղեկացրեց, որ հիմնական գերնպատակն աղքատության հաղթահարումն է:
Համաշխարհային բանկը հիմնադրվել է 1944 թվականին: Բանկի կողմից առաջին վարկը 1947 թ-ին տրամադրվել է Ֆրանսիային` 250 մլն ԱՄՆ դոլար: Այն վերջին 50 տարիների ընթացքում Համաշխարհային բանկի տրամադրած ամենախոշոր վարկերից է: Համաշխարհային բանկն ունի 187 անդամ երկիր, որոնք համարվում են բանկի բաժնետերեր. Հայաստանը բանկին անդամակցել է 1952 թվականից:
Համաշխարհային բանկն անդամ երկրներին հատկացնում է երկու տեսակի վարկ` ներդրումային եւ զարգացման քաղաքականության: Ներդրումային վարկերը հատկացվում են անդամ երկրներում ոլորտային բարելավումներ կատարելու համար, իսկ զարգացման քաղաքականության վարկերն անմիջապես փոխանցվում են տվյալ երկրի պետական բյուջե, որն էլ միտված է համալիր բարեփոխումներ իրականացնելուն:
Համաշխարհային բանկի եւ անդամ երկրների միջեւ քառամյա ժամկետով կնքվում է գործընկերության ռազմավարություն, ըստ որի` սահմանվում է, թե այդ տարիների ընթացքում տվյալ երկիրն ինչ ծրագրեր է իրականացնելու եւ դրա համար ինչ գումար է հատկացվելու:
Պատասխանելով ուսանողներից մեկի հարցին` ինչպիսի վերահսկողություն է իրականացվում հատկացված գումարներն արդյունավետ գործածելու ուղղությամբ` Արտաքին կապերի պատասխանատու Վիգեն Սարգսյանն ասաց, որ միջազգային փորձագետների կողմից պարբերաբար կատարվում են վերահսկողական աշխատանքներ: